لوسيفوروس بدو يلعب بأمور السما؟ السيد نافذ فنيانوس- التيّار الوطني الحرّ / زغرتا 21/06/2008 حدا يفهِّمنا، شو خصّ سمير جعجع بتطويب الأبونا يعقوب الكبوشي؟ منفهم أنو البطرك و المطارين بيهتمّو و أكيد لازم يهتمو بهيك أمور، بس نشوف لجنة مكلّفة بمتابعة هالموضوع اللي إلو خصّا بالسما و أمورها، عند لوسيفوروس؟ أمرالله، هجّر اللي عالأرض، هلّق بدكم تكلّفوه يهجِّر اللي بالسما؟ كنا حاببين نسمع من لجنة التكريم شو قال سمير جعجع؟ شو الوصايا اللي حمّلهن ياها لها اللجني؟ قولكن ذكّرهن:بأن لا تقتل؟ أو لا تسرق، أو دعوا الأطفال يأتون إليّ و لا تمنعوهم؟ أو اتركوا اطفالكم في سرائرهم، كي آتي ليلاً و أخطف أرواحهم؟يا عيب الشوم، طق شرش الحيا عند الكتير من رجال الدين، و صارت القصة مفهومي، هي قصة’ مصالح و قصة حقد أعمى و كره لكل شي نضيف مهفهف بيهالطايفي المنكوبي،و بعدان؟ لوين بدا توصل الأمور مع القيمين على شؤون الكنيسي،تركوه لها المكرم القديس يفوت عا بيوتنا، ضروري تحطّو بصمات سمير جعجع عا ملف قداستو؟ ليش؟ و بأيَّ صفة؟بدكن تكفّرونا بالكنيسي فهمنا و كمان بدكن تفتحو زعل بيناتنا و بين القديسين؟  نحنا منحب كنيستنا و منحب قديسيها ليش بدكم تحشرو الأبالسي بيناتنا و بينهم؟ يا جماعة تطلّعوا بقا بالناس و شوفو وين اتجاها، خلصنا بقا تدجيل. لازم يوقف بقا اللعب بالطائفي و بكنيستنا و إلا رح نضطرنوقف وقفي كبيرة و عالأرض و نخبط إجرينا بقوي و نرفع صوتنا للسما ونقول: " بدنا كنيسي قديسي، و بدنا كنيسي جامعة رسولية ، و بدنا كنيسة ألإصلاح و التغيير، و بدنا كنيسي طاهرة مؤمني مش مسيَّسي ، فلا تخلّونا نقول :" لكم كنيستكم، و لنا كنيستنا.