ما كان مفروض فيك يا جنرال تقول إنك بتروح عا سوريا،كان مفروض تعطيهم للشباب شوية مجال تا ياخدو نفس،بعد لهلق ما بلعوا قصة زيارتك عا أيرن،حرام يا جنرال،الجماعة كانوا ناطرين السفير السوري و السفارة تا يزحفو،و ينبطحو،و يزخو و ينخو،رحت هيك بضربي واحدي بدك تزور سوريا؟ولك يا حرام عليك،لا يهلكو نعمتك من الحكي و من المتاجرة،سوريا يا جنرال؟ولك رحت عالكونغرس و قامت قيامتن،و رجعو صاروا زلم عند الأميركي، نفيوك عا باريس و رجعوا راحوا مجوقلين عا باريس، عم يلحقوك وين ما عم بتروح،و هلق الشيخ سعد رايح عا طهران يا جنرال،و بكرا وليد بك،وبكرا ما بتعرف يمكن يروحو عا سوريا،و قول هيدا الموضوع محسوم،لأنو أميركا عم تزبط الوضع مع أيران ومع سوريا،و الشباب واقفين سنكي طق،ناطرين الإشارة تا يروحو عا أيران و عا سوريا،ولك أيه،هودي تجار يا جنرال، المهم مصالحهن وبيوتاتهم العائلية و الطائفية والعشائريةو"طز"عالحريي والديمقراطيي،يا جنرال الأميركان جابولن سفارة وسفير ديليفيري دغري من سوريا عا بيروت،تا ينعمو الزفتات هون مش عا طريق الشام، بقى الله يرضى عليك ويعفي عنك و يطوّل عمرك،شوف كيف بدك تقطِّع هالكم يوم،لأنو أبواقن و زماميرن زيّتو العدة واليوم من صبح الله رح يبلشو اللت،و الزت، فيا جنرال حاج بقى تعمل هيك سفرات و مشاريع،إرحم هالجماعة اللي صاروا عالأرض ليرحمك من في السماء.....