شي مرّة ما يكون لرئيس الجمهوريي كتلة نيابيي!والله العظيم هوي بيرتاح و الجمهوريي بترتاح،في أحلى من أنو يكون الرئيس ،أي رئيس لكل لبنان؟ما في رئيس ألف كتلة نيابية و ضلّت معو لآخر عهدو.هودي الجماعة اللي بينحسبو عالرئيس،بيمشو معو بيزخم من أول عهدو و لتلات سنين من عهدو ،بعدان بيبلشو يزحطو من حدو، هودي بيسمّوهن اللسيحة و المسيحة و الزخّاخين و النخّاخين.الأمل كبير أنو الرئيس ميشال سليمان ما يعتمد ها الروتين،لأنو لازم يكون الشعب حدو،النواب ما بيحموه الناس اللي بيحموه،و الرئيس سليمان قريب من الناس كل الناس،ليش بدو يفرزن،شي مع كتلتو (إذا عمل كتلي)و شي ضدها؟كل اللبنانيي انبسطو فيه و ارتاحو لألو،ليش بدو ،يقسم الفرح قسمين؟و ليش بدّو كتلي نيابيي؟إذا عندو مشاريع إصلاحيي للأدارة و القوانين و كل الأمور "المشكو"منها، لازم كل النواب يكونو كتلتو،و إذا صار العكس،الشعب موجود،بيوقف حدّو و بيضحي بالغالي و الرخيص.الشعب كفر بالنواب اللي غفيو من سنة 1992 لليوم و صار الدين 50 مليار دولار،و الشعب مزعوج من نواب صارو هني أغنيا و هوي فقير، الشعب مزعوج من نواب بيمشو ورا المال و الكراسي و مين ما أخد أمن بيصير عمّن، الشعب قرف من هالسيرك اللي صرلو ماشي عا حساب مدرستهن و مستشفاهن و لقمتن ، الناس قرفو من نواب قاعدين ما بيشتغلو شي للبنان و لشعبو و معاشاتن كبيري بينما الشعب معاشو بسعر 10 تنكات بنزين.نحنا الناس منحب يكون الرئيس سليمان هوي القانون اللي بدو يحاسب الكل، ما يستثني حدا،و منحب يكون إلى جانب قضايا الناس المحقة،هودي الناس ما إلن حدا،يكون هوي هالحدا اللي بيوقف معن.في كتير إشيا بالدولي بدا تزبيط،و اهما وقف الهدر و الدين.كل لبنان مع الرئيس،بكل الأحزاب و الطوائف و المذاهب،و هيدا الرئيس المطلوب،و هيدا الرئيس اللي بيعطي نتيجي.أما إذا حب فخامتو يمشي عالقاعدي المتوارثي،منقول "يا رب لا تهجر شعب لبنان"....
.